دل مردہ دل نہیں ہے اسے زندہ کر دوبارہ - علامہ اقبال

 دل مردہ دل نہیں ہے اسے زندہ کر دوبارہ

علامہ اقبال

(اسلام اور مسلمان) (ضرب کلیم)

دل مردہ دل نہیں ہے اسے زندہ کر دوبارہ

کہ یہی ہے امتوں کے مرض کہن کا چارہ

ترا بحر پر سکوں ہے یہ سکوں ہے یا فسوں ہے

نہ نہنگ ہے نہ طوفاں نہ خرابیٔ کنارہ

تو ضمیر آسماں سے ابھی آشنا نہیں ہے

نہیں بے قرار کرتا تجھے غمزۂ ستارہ

ترے نیستاں میں ڈالا مرے نغمۂ سحر نے

مری خاک پے سپر میں جو نہاں تھا اک شرارہ

نظر آئے گا اسی کو یہ جہان دوش و فردا

جسے آ گئی میسر مری شوخی نظارہ