اکبرؔ الہ آبادی کی طنزیہ ومزاحیہ شاعری

 اکبرؔ الہ آبادی  کی طنزیہ ومزاحیہ شاعری

اکبرؔ الہ آبادی

حقیقی اور مجازی شاعری میں فرق ہے اتنا

کہ یہ جامے سے باہر ہے اور وہ پاجامے سے باہر ہے

_________________________________________________

شیخ مرحوم کاقول اب مجھے یاد آتاہے

دل بدل جائیں گے،تعلیم بدل جانے سے

_________________________________________________

مغربی   رنگ وروش پرکیوں نہ آئیں قلوب

قوم ان کے ہاتھ میں ،تعلیم ان کے ہاتھ میں

_________________________________________________

ابتدا کی جناب سید نے

جن کے کالج کا اتنا نام ہوا

انتہا یونیورسٹی پر ہوئی

قوم کا کام اب تمام ہوا

_________________________________________________

نظر ان کی رہی کالج میں بس علمی فوائد پر

گراکے چپکے چپکے بجلیاں دینی عقائد پر

_________________________________________________

یوں قتل سے بچوں کے وہ بد نام نہ ہوتا

افسوس کہ فرعون کو کالج کی نہ سوجھی

_________________________________________________

تم شوق سے کالج میں پڑھو پارک میں پھولو

جائز ہے غباروں میں اڑو چرخ پہ جھولو

پر ایک سخن بندہء عاجز کا رہے یاد

اللہ کو اور اپنی حقیقت کو نہ بھولو

_________________________________________________

مغرب کے مرشدوں سے تو پڑھ چکا بہت کچھ

پیران مشرق سے اب فیض کی نظر لے

_________________________________________________

وہ باتیں جن سے قومیں ہورہی ہیں نامور سیکھو

اٹھو تہذیب سیکھو صنعتیں سیکھو ہنر سیکھو

بڑھاؤ تجربے اطراف دنیا میں سفر سیکھو

خواص خشک و تر سیکھو علوم بحر و بر سیکھو

خدا کے واسطے اے نوجوانو ہوش میں آؤ

دلوں میں اپنے غیرت کو جگہ دو ہوش میں آؤ

_________________________________________________

کالج میں دھوم مچ رہی ہے پاس پاس کی

عہدوں سے آرہی ہے صدا دور دور کی

_________________________________________________

کرتے ہو تم خوشامد دنیا بڑھا کے ہاتھ

اللہ کی طرف نہیں اٹھتے دعا کے ہاتھ

_________________________________________________

بے پردہ کل جو آئیں نظر چند بیبیاں

اکبر زمیں میں غیرت قومی سے گڑ گیا

پوچھاجو ان سے آپ کا پردہ وہ کیا ہوا

کہنے لگیں کہ عقل پہ مردوں کی پڑ گیا

_________________________________________________

نہیں رہے گی وہ خوبی جو زن ہے بے پردہ

سبب یہ ہے کہ نگاہوں کی مار پڑتی ہے

_________________________________________________

غریب اکبرؔ نے بحث پردے کی‘ کی بہت مگر ہوا کیا

نقاب الٹ ہی دی اس نے کہہ کر کہ کر ہی لے گا مگر ہوا کیا

_________________________________________________

تعلیم عورتوں کو بھی دینی ضرور ہے

لڑکی جو بے پڑھی ہو تو وہ بے شعور ہے

_________________________________________________

پبلک میں کیا ضرور کے جاکر تنی رہو

تقلید مغربی پہ عبث کیوں ٹھنی رہو

داتا نے دھن دیا ہے تو دل سے غنی رہو

پڑھ لکھ کے اپنے گھر ہی دیوی بنی رہو

مشرق کی چال ڈھال کا معمول اور ہے

مغرب کے ناز و رقص کا اسکول اور ہے

دنیا میں لذتیں ہیں نمائش ہے شان ہے

ان کی طلب میں حرص میں سارا جہان ہے

اکبرؔ سے سنو کہ جو اس کا بیان ہے

دنیا کی زندگی فقط اک امتحان ہے

حد سے جو بڑھ گیاتو ہے اس کا عمل خراب

آج اس کا خوشنما ہے مگر ہوگا کل خراب

_________________________________________________

حرم میں مسلموں کے رات انگلش لیڈیاں آئیں

پئے تکریم مہمان بن سنور کر بیبیاں آئیں

طریق مغرب سے ٹیبل آیا کرسیاں آئیں

دلوں میں ولولے اٹھے ہوس میں گرمیاں آئیں

مرید دہر ہوئے وضع مغربی کرلی

نئے صنم کی تمنا میں خود کشی کرلی

تھے کیک کی فکر میں سو روٹی بھی گئی

چاہی تھی شے بڑی سو چھوٹی بھی گئی

واعظ کی نصیحتیں نہ مانیں آخر

پتلون کی تاک میں لنگوٹی بھی گئی

_________________________________________________

برق کے لیمپ سے آنکھوں کو بچائے رکھنا

روشنی آتی ہے اور نور چلا جاتا ہے

_________________________________________________

ہماری باتیں ہی باتیں ہیں سید کام کرتا ہے

نہ بھولو فرق ہے جو کہنے والے اور کرنے والے میں

_________________________________________________

واہ اے سید پاکیزہ گہرکیا کہنا

یہ دماغ اور حکیمانہ نظر کیا کہنا

قوم کے عشق میں یہ سوز جگر کیا کہنا

ایک ہی دھن میں ہوئی عمر بسر کیا کہنا

_________________________________________________

بنگلوں سے نماز اور وظیفہ رخصت

کالج سے امام ابو حنیفہ رخصت

صاحب سے سنی ہے اب قیامت کی خبر

قسطنطنیہ سے ہیں خلیفہ رخصت

_________________________________________________

کالج سے جنہیں امیدیں ہیں مذہب کو بھلا کیا مانیں گے

مغرب کو تو پہچانا ہی نہیں قبلے کو وہ کیا پہچانیں گے

_________________________________________________

عمر گذری ہے اسی بزم کی سیاحی میں

دوسری پشت ہے چندے کی طلب گاری میں

_________________________________________________

بتاؤں آپ سے مرنے کے بعد کیا ہوگا

پلاؤ کھائیں گے احباب فاتحہ ہوگا

_________________________________________________

کچھ صنعت و حرفت پہ بھی لازم ہے توجہ

آخر یہ گورنمنٹ سے تنخواہ کہاں تک

_________________________________________________

عاشقی کا ہو برا اس نے بگاڑے سارے کام

ہم تو ABمیں رہے اغیار BAہوگئے

_________________________________________________

بوٹ ڈاسن نے بنایا میں نے ایک مضمون لکھا

ملک میں مضمون نہ پھیلا اور جوتا چل گیا

_________________________________________________

چھوڑ لٹریچر کو اپنی ہسٹری بھول جا

شیخ و مسجد سے تعلق ترک کر اسکول جا

چار دن کی زندگی ہے کوفت سے کیا فائدہ

کھا ڈبل روٹی کلرکی کر خوشی سے پھول جا

_________________________________________________

مے خانہ رفارم کی چکنی زمین پر

واعظ کا خاندان بھی آخر پھسل گیا

_________________________________________________

دختر رز نے اٹھا رکھی ہے آفت سر پر

خیریت گذری کہ انگور کو بیٹا نہ ہوا

_________________________________________________

دنیا میں ہوں دنیا کا طلب گار نہیں ہوں

بازار سے گزرا ہوں خریدار نہیں ہوں

زندہ ہوں مگر زیست کی لذت نہیں باقی

ہر چند کہ ہوں ہوش میں ہشیار نہیں ہوں

اس خانہ ء ہستی سے گذر جاؤں گا بے لوث

سایہ ہوں فقط نقش بہ دیوار نہیں ہوں

وہ گل ہوں خزاں نے جسے برباد کیا ہے

الجھوں کسی دامن سے وہ خار نہیں ہوں

_________________________________________________

کوئی ہنس رہا ہے کوئی رو رہا ہے

کوئی پا رہا ہے کوئی کھو رہا ہے

کوئی تاک میں ہے کسی کو ہے غفلت

کوئی جاگتا ہے کوئی سو رہا ہے

کہیں نا امیدی نے بجلی گرائی

کوئی بیج امید کے بو رہا ہے

اسی سوچ میں تو رہتا ہوں اکبرؔ

یہ کیا ہو رہا ہے یہ کیوں ہورہا ہے

_________________________________________________

دنیا ابھارتی ہے آج اپنے عاشقوں کو

مرجائیں گے تو ان کا کل نام بھی نہ لے گی

_________________________________________________

جنت بنا سکے گا ہر گز نہ کوئی اس کو

دنیا یوں ہی چلے گی‘اکبرؔ یوں ہی چلے گی

_________________________________________________

فارسی اٹھ گئی اردو کی وہ عزت نہ رہی

رہے زبان منہ میں مگر اس کی قوت نہ رہی

بند کر اپنی زباں ترک سخن کر اکبرؔ

اب تری بات کو دنیا کی ضرورت نہ رہی

_________________________________________________

اونچا نیت کا اپنی زینا رکھنا

احباب سے صاف اپنا سینا رکھنا

غصہ آنا تو نیچرل ہے اکبرؔ

لیکن ہے شدید عیب کینا رکھنا

_________________________________________________

گر جیب میں زر نہیں تو راحت بھی نہیں

بازو میں سکت نہیں تو عزت بھی نہیں

گر علم نہیں تو زور وزر ہے بے کار

مذہب جب نہیں تو آدمیت بھی نہیں

_________________________________________________

خدا کے فضل سے بی بی، میاں دونوں مہذب ہیں

حجاب ان کو نہیں آتا ، انہیں غصہ نہیں آتا

_________________________________________________

رقیبوں نے رپٹ لکھائی ہے جا جا کے تھانے میں

کہ اکبر نام لیتا ہے خدا کا اس زمانے میں

_________________________________________________

ہم ریش دکھاتے ہیں کہ اسلام کو دیکھو

مِس زلف دکھاتی ہے کہ اس لام کو دیکھو

_________________________________________________

وصل ہو یا فراق ہو اکبر

جاگنا ساری رات مشکل ہے

_________________________________________________

ہم ایسی کل کتابیں قابلِ ضبطی سمجھتے ہیں

جنھیں پڑھ کر کے لڑکے باپ کو خبطی سمجھتے ہیں

_________________________________________________

ڈارون صاحب حقیقت سے نہایت دور تھے

میں نہ مانوں گا کہ مورث آپ کے لنگور تھے

_________________________________________________

یہ موجودہ طریقے راہی ملک عدم ہونگے

نئی تہذیب ہوگی اور نئے سامان بہم ہوں گے

نئے عنوان سے زینت دکھائیں گے حسیں اپنی

نہ ایسا پیچ زلفوں میں نہ گیسو میں یہ خم ہوں گے

نہ خاتونوں میں رہ جائے گی پردے کی پابندی

نہ گھونگھٹ اس طرح سے حاجب روئے صنم ہوں گے

بدل جائے گا انداز طبائع دور گردوں سے

نئی صورت کی خوشیاں اور نئے اسباب غم ہوں گے

خبر دیتی ہے تحریک ہوا تبدیل موسم کی

کھلیں گے اور ہی گل ‘زمزمے بلبل کے کم ہوں گے

عقائد پر قیامت آئے گی ترمیم ملت سے

نیا کعبہ بنے گا مغربی پتلے صنم ہوں گے

بہت ہوں گے مغنی نغمہء تقلید یورپ کے

مگر بے جوڑ ہوں گے اس لئے بے تال و سم ہوں گے

ہماری اصطلاحوں سے زباں نا آشنا ہو گی

لغات مغربی بازار کی بھاشا سے ضم ہوں گے

بدل جائے گا معیار شرافت چشم دنیا میں

زیادہ تھے جو اپنے زعم میں وہ سب سے کم ہوں گے

گزشتہ عظمتوں کے تذکرے بھی رہ نہ جائیں گے

کتابوں ہی میں دفن افسانہ جاہ وحشم ہوں گے

کسی کو اس تغیر کا نہ حس ہوگا نہ غم ہوگا

ہوئے جس ساز سے پیدا اسی کے زیر و بم ہوں گے

تمہیں اس انقلاب دہر کا کیا غم ہے اے اکبرؔ

بہت نزدیک ہیں وہ دن کہ تم ہوگے نہ ہم ہوں گے

_________________________________________________