فکرِ معاش، عشقِ بُتاں، یادِ رفتگاں
مِرزا محمد رفیع سودؔا
بدلا ، تِرے سِتم کا کوئی تُجھ سے کیا کرے
اپنا ہی تُو فریفتہ ہووے خُدا کرے
قاتل! ہماری نعش کو تشہیر ہے ضرُور
آئندہ تا ، کوئی نہ کسی سے وفا کرے
اِتنا لِکھائیو مِرے لَوحِ مزار پر
یاں تک نہ ذی حیات کو کوئی خفا کرے
بُلبُل کو خُونِ گُل میں لِٹایا کروں، مجھے!
نالے کی گر چمن میں تُو رُخصت دِیا کرے
فکرِ معاش، عشقِ بُتاں، یادِ رفتگاں
اِس زندگی میں اب کوئی کیا کیا، کِیا کرے
عالَم کے بیچ ، پِھر نہ رہے رسمِ عاشقی!
گر نیم لب کوئی تِرے شکوے سے وا کرے
گر ہو شراب و خلوتِ محبوب خوب رُو
زاہد تجھے قسم ہے جو تُو ہو تو کیا کرے
تعلیمِ گریہ دُوں اگر ابرِ بہار کو!
جُز لختِ دل صدف میں نہ گوہر بندھا کرے
تنہا نہ روزِ ہجر ہے سودؔا پہ یہ ستم
پروانہ ساں وصال کی ہر شب جَلا کرے
No comments:
Post a Comment